Hipangaru 1: Iblis, Syaitan, Jin.

1- Mayta' in manga jin madaran mangjilaka' pamanusiya'?

Sasuku' sin manga jin kafir mabunsi pa manusiya' labi-luba'na pamanga Muslimin, ha duwa sabab:

Hikaisa, in kita manusiya' ini bahgu datung, sabab, sila in nakauna piyapanjari sin Tagipun.

Farman sin Allah swt "Wamaa khalaktul jinna wal ins......" (Iban piyapanjari-Ku in Jin iban manusiya'....-AzZariyat ayat 56) siabbut muna in Jin sabab sila in piyapanjari muna.

Manjari mabunsi sila hamanga manusiya' piyaratung palaum dunya, iban manusiya' na in mag lalarak sin dunya, dain ha dagat sampay pakatahayan (Mag bugit basura baybidda', mag timbak ista' (majagjag in sahasa'), testing pungluh neuklear iban mag asag lana palaum dagat, mag pangdatag bud mag pamila' kahuy amuna in maka larak sin ecosystem). Hangkan madugal in manga jin na over-take sila sin manusiya' "pandatang" tup ini kita in "halaw".

Hikaduwa, bunsi sin iblis laknatullahi alay iban manga anak apo' niya (Syaitan) pa bani Adam. Sabab jingki iban sakit atay.

Farman sin Allah swt "Iban (ingata) ha waktu kami nag farman pamanga malaikat: Sujudna kamu kan Adam; in sila magtuy simujud malaingkan Iblis; in siya dain ha tompokan sin jin..." Al-Kahfi ayat 50.

In Iblis di' mabaya' sumujud kan Adam a.s. amin piyapanjari dain ha lupa', sabab siya labi mulliya piyapanjari sin Allah swt dain ha laga sin kayu maita' subay sumujud kan Adam a.s.? Takabbur, bunsi iban jingki sin Syaitan pa manusia' sampai bihaun. Wallahu a'lam.
-------------------------------

2- Unu in ginis sin Jin mag pangjilaka' iban kahalan sin maglabut pa manga Jin? Iban biyadi'in in pagkila ta tanda-tanda sin najilaka' iban sabab musabab niya?

Muna-muna ingatunta in palihalan sin jin yan aun duwa. Hikaisa Syaitan, hikaduwa jin apo' (magpangatayan). In Syaitan yan sila katan halaum program sin apo' nila Iblis laknatullahi alay sumasat pamanga muslimin bariman hasupaya lumiksad in aqidah nila, ha supaya makaagad kanila deretso palaum nalka' jahannam ha adlaw mahuli. In sila (3 inasir - kayu, hangin, tubig) dirihilan kawasa sihir sin Allah swt mayu' makusug dain ha kaapo'an jin nag huhula' ha dagat iban ha ka bud-buran. In pag sasatun sin Syaitan duwa:

1- Sumasat hamanga tau bariman bat makaliksad in aqidah, muna-muna palawakun dain ha pag-iman nila (sumuuk ha liyangan, lumayu' ha diyaakan sin Agama Islam),

2- Sumasat hamanga kaapo'an jin, ha supaya puhingaun nila in manusiya' misan sabab sibi'-sibi'. Daakun nila sumasat atawa mangjilaka' dimihil sakit pamanga manusiya' labi-luba' na manga muslim bar-iman ha supaya ma'aun in pagsusun nila ha tatabanga sin Allah swt (saukat na di' maig in sakit), iban daakun nila in kaapo'an jin tumabang hamanga pangungubat amin nag uusal sihir ha supaya madaran maglabut kanila (mag paka'un pa kaapo'an jin), ha sabab yadtu bat gumanap in kahagad nila "wai maka'uli' sakit malaingkan subay mag labut" sadja (in labutan yan mataud ginis, aun labut kakaun putan, i-iklugan piyapanjihan, aun isab manuk itum sumbay'un atawa bu'luyun ha baba' nunuk atawa pang-pang). In manga pakaradjaan ini guwa' pa syirik. Bang kauli'an in nasasakit sin kaedah nila mag labut bihaini ampana sumaplag in kangi'an. Amuna ini in paaslagun sin Syaitan.

.

Aykita isab, dungugunta in kaput sin manga mag lalabut. Laung sin manga pangungubat ahli mag lalabut "Hisiyu-siyu in imiyan bahawa in makauli' ini lalabutan, ha sabab jin in tumabang himilla' sin sakit, hati niya lalabutan iban jin in maka uli' mutlak! Asal na tuud sahih syirik in kakahinang ini. Sumagawa' in i'tiqad namu', way makauli' malaingkan hambuuk-buuk SIYA, yakni Allah swt".

.

Piyatilag nila pa "Bang syirik in mag labut ha kahalan ikhtiyar mag ig sakit, syirik dasab in manga nag paubat pa hospital, sabab doktor iban ubat niya in maka uli'? Atawa siyapuhan mu in ugud ha pamaranan mu sin oil ubat, danan na ig in ugud mu, hati' bang iyanun ta oil ubat in maka uli'? Sahih yan syirik katan ha way khilaf. Sagawa' hibalik ta in kawasa mag pa uli' amuna in Allah swt. In sakit piyanaug sin Tagipun aun sabab katan, in jin yan hambuuk sabab sadja, in ka-ubat ubatan amura isab sabab sadja, in hakikat sin sakit dain ha Allah swt ra".

.

Aun kabunnal sin daawa nila bang kawaun dain ha ilmu' hakikat. Amusadja laungta ha syariat (zahir) ha pangita' sin manga fuqaha' kanila malummi'. Bang mari pa kamu', salagi' in manga pangungubat iban sin iyubatan makahati sin maksud "magubat" ha kalna' Allah swt ra in makauli', korek. Amusadja mataud pangungubat (bukun sab katan) iban sin manga iyubatan di' mag hihinang sin DAAKAN. Hangkan kakitaan ta tuud in nur halupa dagbus nila itum, mahang in nag sasahaya sin sahaya Wudhu'. Hangkan malingkat in daawa nila dain ha kakahinang, Allah swt ra in mamista katu' niyu. Wallahu a'lam

.

Kilahun tanda'-tanda' jilaka'

Jilaka' yan bahagi'un ta 3:

1. Jilaka' sin jin way tagdapo (Labha').
2. Jilaka' sin jin diyaak sin tagdapo (Hinang-hinangan) atawa
3. Jilaka' sin jin ipatan (Saka/Gimbaran)

In pag jilaka'un yan tantu sadja kakitaan ta jumari ha pamaranan sin tau najilaka'. Kakitaan ta madaran magligid-ligid kasakitan atawa pagsuran sin jin mag bissara baibidda'. In magaan tuud jilaka, amin pag kaabatan hat hinglaun. Kaabatan biya' manga tandugun atawa hinglaun sin hinglaw maka inu-inu, atawa ugud atawa sakit gimua' dain halaum baran amin maka inu-inu, muna-muna madtu pa hospital muna hi pa kita' bang kaubatan nila. Bang nila mahunit kaubatan subay na lumawag ubat ha manga pangungubat. Amuyan in tanda'-tanda' jilaka' sin manga apo' jin. In sabab marai' timagna' dain ha panawan (nag camping, nag laud, nag uma nag lapa, mianaw ha higad kati'an atawa higad dagat nakarugtul hayup).

.

Labha'

Kabiyaksahan tuud in manga sabab sin labha' ini dain ha pakaradjaan sin jin kati'an atawa jin dagat/tawid amin bukun i'ipat sin manusiya'. Sabab sin labhah' aun dua: Hikaisa tiyuud, hikaduwa way piyagtuuran:

.

In tiyuud, biya' na sin miyanaw-manaw kaw pa laum/higad kati'an, ha sabab sadja ihi' mu atawa tasak mu baybidda' atawa naka rugtul kaw anak sin kaapo'an, atawa nag bissara kaw takabbur, pag ui' musadja pa bay tiyandug kaw magtuy kiyaabatan atawa siyuran kaw sin jin. Atawa simakit in o-mu (magrain) atawa simakit in tiyan atawa siki mu hangkan mag susung in adlaw magsusung in sibi' (numahut atawa kumullus maig in unud) amuyan in tanda'-tanda' sin labha' piyagtuuran kita jilaka'.

.

Way piyagtuuran, biya' na sin naka gi'ik kaw lassun jin atawa naka tasak kaw sihir sin jin ha panawan mu, hangkan magsakit in pad siki mu atawa ugurun hi siki sampay pa bitis mu. In ini tanda'-tanda' sin kiyugdan sin way piyagtuuran, isa-isa mura.

.

Hinang-hinangan

Sabab sin hinang-hinangan ini dain ha jingki iban sakit atay ra sin manusiya' papagkahi manusiya', pagga maray' di' makaatu mag bunu' atawa maglagut magsuntuk, imusal jin amin i'ipat ha supaya duma sakit madtu pa kuntara niya. Hinang-hinangan atawa santaw (bang ha Indonesia pagtawagun santet) yan nabahagi' 3:

1. Santaw: Bisa-lassun (Piyuklas/Khusus)
2. Santaw: Kasi-lasa (Hipag babae)
3. Santaw: Bunsi (Hipag pamutas silaturrahim)

Santaw bisa-lassun in tudjuhan niya mamatay tau. In tau bang kugdanan mapatay magtuy atawa matay agak-agak (magtiyahunan). Hi para ha hangin atawa hipakaun. Pagsud palaum baran sin kiyugdan magtuy masakit. In tanda' sin sakit santaw bisa ini mag sakit in daghal, mag pasu' biya' sin siyunug iban mag sakit in manga lulu'atan, iban lumamma in pag asa (pagkausug) magkalawa' in gana ha babae atawa pa usug (bang siya babae). In santaw bisa ini aun 3 gred (gred A, gred B, gred C). Gred A, bang in tau kugdanan saruun-duun da mawapat, sabab mag suka magintau' dugu' di' magbugtu' halaum duwa pa to jam, bang di' kasautan mara pa hospital "manaw" magtuy. Gred B, bang in tau kugdanan mag pituhan atawa magbiyulanan isab ampa in sakit niya kananaman, bang katuyan sin sakit mawapat magtuy. Gred C, sakit mag tiyahunan ampa kananaman niya in sakit. In gred C ini in tudjuhan niya patayun agak-agak, binsanaun in baran iban famili sin nasakit. In sakit ini bang di' paubatan mahinang sakit dakula' halaum baran iban kalaminan (katampiyasan) in manga famili niya. In sakit gumua' ha laum tiyan, sakit, kanser, ulser (gastrik), majagjag in asang pagnanapasan, mapupud in atay (hipatitis), sumakit in jantung (sumud in lassun palaum), ma jam in bua' hawakan amin mag sasa'an sin dugu' (himodalisis in labas), mag ubu-ubu madaran.

Santaw kasi lasa mataud ginisan, in femos tuud habangsa ta amuna laungniya mamaya'-maya' "ya'agaran". Meaning sin ya'agaran amuna laungniya piya'agaran kamilla-kamilla atawa biyabassa-bassahan (mataud bihaini sihir). Kamatauran sin ilmu' bihaini di' maatud in mata nila sin babae, pag atud sin babae ha mata nila maya' magtue. Bang di' mui' (pa usug) in babae marupang sin "love-sick". Sambatan sin bahasa, matug di' mahaluk, kuma'un di' kansuban, mamaigu' di' mabasa' sabab tumtum kan 'hansam' kalasahan. Damikkiyan isab bang babae in makaput ha usug, some times babae dasab in himinang-hinang saukat na bahasa di' kabayaan sin usug "crush' niya. Mayta' di' kabayaan sin usug bang nag babahu' na kepet, na bubulakay na in buhuk laung mu manga pontianak na in dagbus, ubus yadtu in burak ha bayhu' biya' na dakmul unu, kapagtanuman na lahing. Aun pa isab ilmu' bat-batun in ngan sin babae, pukpukun kaagi in u'an, pag kunsum maglag-lag kaniya in babae sabab aun "nag hapen" kaniya kabi'i. Mataud pa ginisan ilmu' hi panawag ha kasilasa sin babae. Bang in babae kugdanan in mag hapen kaniya "sakit". Bang maasawa sin usug amin nanghinang-hinang kaniya in kaaunan nila mag kalu magkut-kut, makapagbugit da in labas. Atawa bang di' maasawa sin usug nanghinang-hinang, in babae yan mahinang sakitan sabab in sihir diyara niya sampai siya makabana dugaing. In labas niya madaran mahinang bituanan sabab madaran maglambung in tao naghinang-hinang kaniya misan di'niya kabayaan.

Santaw bunsi, agun sali' iban santaw kasi lasa. Bang santaw kasi lasa hipamaya'-maya', in santaw bunsi isab mabunsi siya ha tao misan kiyalalasahan niya dain tagna'. Sasuku' in kiyugdan sin santaw ini mabunsi in manusiya' kaniya. Bang subul in kiyugdan mahunit makaasawa, damikkiyan in babae sab mahunit maka bana. Bang taga bana isab makapagbugit masapat sabab madaran mag kut-kut biya' kuting iban ambaw. In katan santaw nasabbut kaina asbab niya sihir, kaubatan siya sin tau makaingat. InsyaAllah.

In tanda' dakula' habaran sin kiyugdan sin santaw kasi-lasa iban santaw bunsi, taga pannyakit buwasir katan. Buwasir in ma'ana niya, maglupput in jubul. Hangkan maglupput in jubul niya aun pugaran sin lassun santaw halaum tiyan niya. Aunda isab in maglupput in jubul bukun sabab sin santaw, sabab dugaing biya' manga sabab nakakaun siya lassun mangi' naka palaum tiyan niya. Kapahaman tana sadja, ha zaman bihaun, ha kakaun sin manusiya' liyalassunan katan, dain ha sayul-sayul pa manga manuk pa ista' ha laud. Bang makasud palaum tiyan, bang subra asal nasadja mahinang lassun pa baran.

Saka/Gimbaran

Jin pag ipatun pagnganan siya SAKA bang di ha Malaysia, bang mari pa Sabah pagtagun siya GIMBARAN. In madaran magipat jin saka ini manga pangungubat amin nag uusal jin bang sila magubat, some times paghinangan sila ini bay-bay ha dugu-dugu sin manga pangungubat. In jin saka ini ginisan, kamatauran niya manga makusug katan in sihir nila. In manga jin saka ini kumusug in 'power' sihir nila bang sila pakaunun madaran (tugtugan sin kamannyan, atawa labutan). Meaning, kumusug sila sin dusa syirik sabab tiyatabangan sin syaitan ha taas, hangkan mahunit magkaraug bang magbunu' ra pagkahi jin. In problema dakula' sin jin saka ini, mahinang habit nia in pag pakaunun (tugtugan kamannyan atawa labutun) hangkan bang mawapat in tag ipatan numaug in hayup ini pa anak apo' niya. In janji' sin jin saka ini, "Usala aku tabangun takaw, sumagawa' paka'una aku", jaga kaw bang di' mu mapaka'un mamuhinga' na yan. In jin saka ini nahinang ha 3 parkala':

1. Turun: In jin ini mag patagainup pa manusiya' bahasa in siya yaun wali mag panabang. Ampa siya himindu' biyaddi'in in pagsug-sug kaniya bat siya maka tabang magubat. Kugan na in pangungubat, ma'aunna in parjanji'an sin sila karuwa mag tabang tiyabangi. Jin muna in dimihil syarat ha pangungubat, subay siya pakaunun (labutan, tugtugan asu) akunan sab sin pangungubat. In guwa sin ilmu' bihaini sihir.
2. Ilmu' Pagkausug: Amuna ini in ilmu' bunut basa' pagiyanun, di' pagukun sin punglu' di' sumampai pa baran mahinang tubig, bang lagutun umumpak sadja in barung, makusug mag angkat barang misan gatusan kilo tanggungun biya' da way kaniya. In ilmu' ini bang in tag kaput di' makaingat duma kaniya atawa di' maingat sin nahu niya, pag wapat sin tagkaput "lutaw" in guwa' sambat sin kaybanan. Amuna ini in pagnganan sin kamaasan ta ilmu' tapil. Hisiyu in tumapil? Malaikat atawa jin? Way na dugaing dain ha jin. In jin sin ilmu' tapil ini mataud ginis, aun kafir iban aunda isab in Muslim. Kamatauran sin kamaasan maingat magusal ha jin tapil iban kaingatan nila in "puklasan", iban sila ini amuna in mag aammal ibadat makusug ha wai nangandul ha tapil nila malaingkan hambuuk-buuk in Tagipun. Mataud dasab in kamaasan nasa' nag da. In tanda'-tanda' sin aun jin tapil, in tau niya pangdurugal, mapasu' in pag-o, di' katiku'-tuku'an mamunu' magtuy. In jin yan piyapanjari dain ha laga sin kayu. Hisiyu in sumuuk (mamagay) kanila maluhay masu' in pangatayan sapantun pasu' sin kayu.
3. Anak nalawa' halaum tiyan: Aun sab manusiya' mag burus, misan 6 pa 7 bulanna nag burus, pagkita'-kita' nalawa' halaum tiyan. Misan in doktor mainu-inu ra, maita' nalawa' in bata' halaum tian misan na check-up na siya sin limabay-labay yaun burus. In biyurus in bunnal niya anak ghaib nabilang na jin. Aun yan lillayan sin kahalan ini amin di' ta ma lillay ha masa ini. Pag put sin manga bangsa ta hinangan na bay-bay, ampa butangan kakaun ha taas, komplet na iban panji-panji niya. In bunnal niya in anak yadtu limaya na pa alam jin ha kahandak sin Allah swt, sabab in anak jin ini wai ra mahinang niya unu-unu, dih da manga makatabang misan mangubat. Laung sin kaibanan makatabang kunu', asubuhun ta bunnal baha'? Subay aun 'scan' ta ampa ta kaingatan bang bunnalka in mag panabang anak limaya atawa ka jin dugaing amin simaut palaum bay-bay ampa nag pasalupa anak limaya?. Bang maipat na ha bay-bay mahinang na siya Saka. Manabang na in luun sin bay-bay ha way panghati nila bunnal ka anak nila limaya atawa jin ifrit in simalta' yaagaran sin syaitan. Bunnal mag panabang in "luun" sin bay-bay, sumagawa' jaga kamu, yan in susungun tumabang pakangi'an. Aun da isab amin nawapat in bata' halaum tiyan, biya' manga kiyapakpakan. Yan way na unu-unu, kahandak na sin NAGPAPANJARI. In bata' yan taga roh (Nyawa) halaum tiyan, minui' hukum siya sawaipa limahil. In roh niya mui' pa tag IPUN mag balik. Tanumun tana sadja kubulun. Pag put sin kaibanan sab patahayun in pak-pak nila, burakan ampa hinangan bay-bay. In kes bihaini, in nyawa sin bata' magtangis dum adlaw sahingga siya hikakubul. Aun kiyasakupan namu' kes biya'haini. Inna lillahi wa inna ilayhi raji'un....

"Sila karuwa di' makahindu' (unu-unu) misan pahambuuk tau sadi'pa maka'iyan: "Bunnal tuud kami nahinang panulayan (kaymu), ha sabab yadtu ayaw kamu mahinang kafir". Manjari, nag pahindu' sila dayn ha karuwa malaikat yadtu biyaddi'in in pag sihir, danan in sila nakapabugit ha antara' hangkatau (bana) iban asawa niya. Iban in sila yadtu (ahli sihir) di' makadihil mudharat sin sihir nila pa hangkatau, bang bukun ha izin sin Allah. Iban in sila nag anad sin hambuuk parakala' sin di'da makadihil mudharat kaniya iban di'da isab makamumpaat. Asal bunnal tuud in sila nag yakin bahwa hisiyu-siyu in sumambi' (Kitab Allah) pa kakahinang sihir yadtu, way tuud kauntungan sin baran niya ha adlaw akhirat, iban nakalandu' in kangi'an sin kakahinang nila atas diyagang in ginhawa baran nila pa sihir, bang sila makahati". Al-Baqarah ayat 102.

Wallahu a'lam,

Ibnu Elaji

Sakit 3: Magsakit In Buli' Pugay, Taykud, Hawakan

Sakit Sin Kamatauran Usug

Kiaubatan: Mataudna in kiaubatan namu' sin sakit bihaini majoriti manga kausugan.
Simtom: Magsakit in buli' pugay iban taykud. In sakit ini bang pasaran mahinang sakit hawakan. Bang tumukku' biya' liyalansang in taikud, mahapdus ampa masakit tumagna' dain ha buli' pugay. Maka inu-inu, bata' bahgu pa (manga kasubulan) maita' magsakit in taykud? Iban Mahunit mag pakaasawa, magliya'unan.
.

Lillayun ta:

Sa di'pa kita sumuy-suy mag pahaba', muna-muna hi patilag ta in hayup pagnganan "Pontianak". In pontianak ini hambuuk tumpukan sin Jin. In lupa dagbus nila sumali' pa manusia' amusadja malummi' aturun bang bandingun iban lupa dagbus sin manusia'. Biya' sapantun nag buburak sina' madtu kaagi in baihu' nila. In sila ini mahaba' in buhuk sampay pa tiyan iban daran nag babadju puti' amin di' kakitaan in baran. Telnus madtu sin kakana' puti', mapinu ra kuman in kakana' niya labi mapinu pa dain ha sutla'. Pontianak usug atawa babae agunda sali' in dagbus nila. Bang ha hirarki tumpukan sin jin, sila na ini in landu' malamma wai kusug. Amu sadja in kukku nila nag dara lassun (sihir) bang in kabataan kakaputan niya magtuy mahinglaw atawa tandugun ha izin sin Allah Taala.

.

Sakitan

Pa manga kausugan, labi-labi na amin madaran magguwa' dum asal sumakit nasadja in taykud nila sabab tapu'an sin pontianak. In pontianak ini aun 2 ginis, hikaisa nag huhula' halaum kabay-bayan. Hikadua ha kakahuy-kahuyan (ha guwa' bay). Hangkan bang in kausugan madaran maglabay ha area nila kunsunadahun nila magtuy pag agawan. In pag tapu' nila kumupkup tuud ha taikud. Pakain-pakain na sadja kaw miamagad nasadja. Maglulugay sumakit na in taykud sin ta'o amin tiyumpayan niya. Sabab nag dara duwa baran (baran sin ta'o iban baran sin Pontianak).

.

Bang subul in katapuan sin pontianak ini mahunit magpakaasawa. Lagi' bang in subul yan di' mag aammal ibadat. Landu' malamma in spiritual niya ampa na mag duruhun, magliyaunan. Sabab mayta'? In sumangat sin usug yan nag kasilasa na iban sin pontianak, hangkan bang aun kabayaan niya babae pamaya'-mayaan, in babae di' mabaya' kaniya (duwal kidnapun). Bang sab aun babae mabaya' kaniya, siya sab in di' mabaya'. Bang sab taga tunang na, mag kalu sadja isab way halihan, some times mabutas. Sabab in nanayam amuna in pontianak ha taikud niya.

.

Pagubat

In tag baran subay dih palabihun in pag "triping" niya ha manga chika', subay palabihun in ammal ibadat ha supaya umaslag in nur niya. In manga jin yan kapasuan sila sin Nur Ibadat, sabab halaum ibadat ta madaran kita mag dzikir mag munajat pa Allah swt, amuyan in mahinang nur atawa sahaya makasunug kanila. Lumawak sila.

.

Bang nakalandu' in lisu' mag ammal ibadat, subay sila mangaru pamanga makaingat mag ig sin hayup yan. Bang mari pakamu' hukutan sadja luunun palaum kassa', atawa butasun dain ha baran sin tiyatapuan niya. Subay maigu' suwwa' iklug tawalan sin Fidyah 7 Al-Fatihah (palabihun labi maraw) bat maig in langsa sin pontianak ha baran sin tiyapuan. Pag ig sadja sin pontianak, saruun-duun maig dasab in sakit taykud-buli' pugay iban hawakan niya. Iban gumaan na in baran niya. InsyaAllah.

.

Subay ra mag ammal ibadat in tag baran, sabab balikan da siya sin pontianak dugaing isab. Sabab way nur atawa sahaya in spiritual nia, nang lindum sadja. Nasasat kita ha duhul dan, subay ra mag balik kita pa puunan sin dan, pa dan buntul sin Allah swt. Wallahu a'lam.

Sakit 2: Labha' Nahinang Strok

Ngan: Kialupahan in ngan ( Maas usug)

Lokasi: Sandakan, Sabah (Batu 3).

Sakit: Strok (Patay in hansipak baran)

Ummul: 65 (Labi kulang)

Sakit timagna': 2006

Kiyauli'an : 2008

Simtom: Di' agun makapanaw, mabaliskat in siki bang manaw. Di' makabissara bia' umaw sabab di'na mara in simud mamissara.

Sue-sue sin palihalan pagubat:
Hambuuk adlaw ha Sandakan ha awal tahun 2008, ampa bahgu datung ku dain ha Lupah Sug (Nag shooting ha manga nag Rally 'Sultanate of Sulu" ha tianggi) iban sungkuna lumupad pa Kuala Lumpur, aun hambuuk taiymanghud miyaun pabay mangayu' tabang. Aun kunu' lahasiya' niya na strok di' na maka panaw paubatan. Laung ku subay sayan dahun madtu pa hospital. Laung niya bakas na iban ginisan pa ngungubat nakaubat sagawa' wai pa diulan sin Allah swt kaulian, hangka tahun na iban tunga' masi-masi naman in sakit. Laung ku ok, sung kadtuun ta. Sulayan ta sab sin teknik atawa kaedah ta, bang magdul in Allah swt kaulian laungku.

Ampa wai pa aku naka sulay imubat ha manga tau na strok biya' haini. Hawpuun ta, didtu na kami ha bay sin maas nasasakit. Siyalam kuna in maas, asal bunnal di' makabissara biya' tuud umaw. In manga kaanakan niya pa manga lahasiya' yaunna nag lilingkud ha higad ding-ding kimikita'.

In pagubat yan muna-muna hi lapaz ta in istighfar (taubatan in kasaan dosa ta iban hi munajat hi pangayuh ta in katan tatabangan pa Tagipun), fidyahan ta muna suratul Fatiha pa tau na sasakit (Ha supaya humaluy in in sakit ha baran niya, pahaluyun sin Allah swt), ubus yadtu bassahan ta 3 Qul (Al-Ikhlas, Al-Falak, An-Nas) bat tumu'lid buntul in atay ta dain ha sasat sin Syaitan ha masa magubat.

Hawpuun ta, tilik ku na (scan) in sakit. In muna-muna timampal aun hayup ha ulihan sin maas, mahaba' in buhuk kulung kaslugan iban itum in pa maranan. Biya' bodyguard kaagi in kahantang (siya sayni in jaga sin sakit bat di' kaubatan sin pangungubat), di' tuud jumawab bang asubuhun. Liawag kupa bang aun nag daak kaniya, sakali aun pa hambuuk dakula' apo' Jin hataas nunuk nakura' sin haba' buhuk yadtu. Di' da jumawab misan asubuhun, asal kiyaingatan ta bang di' jumawab asal aun pa nakura' makusug nag daak kaniya. Bunnal pagkita' aun pa nag monitor kania mas malaggu' ha dugaing kahuy dakula'. In ini amura isab di' da jumawab bang asubuhun bang siya in nanglabha'. Meaning aun pa nakura', ha dilast tuud kiaabutan na, apo' Jin kahuy (Biya' sibi'-sibi' dan in pag baran sa' in ilmu' sihir ha baran niya sangkad, makusug). Nag soal-jawab na kami:

• -Aku: Assalamualaikum...!!
• -Apo' Jin: Hmmm......!! (Nag kiling-kiling sin o diyudugalan, meaning bukun Muslim).
• -Aku: Maita' mu jilaka' in maas ini? Unu in dusa niya kaimu?
• -Apo' Jin: Maita' kau umasubu.. wai lamud mu!! (Diyudugalan nag tatanam mamunu').
• -Aku: Kami manusia' mag tabang tiyabangi ha karayawan, aku miyari ini tumabang. Kawa'a in haq mu dain halaum baran sin maas ini. Bang di' malaggu' in pag bunu' ta karuwa (Piya kaslah ku in suala ku).
• -Apo' Jin: Iyan tanakaw wai lamud mu...!! Way lamud mu!! (Imulak sin dugal).
• -Aku: (Way na aku timagad, timanam na aku, asal mag bunu' na in labas. Biatbat kuna in ayat dain ha surah Yunus ayat 81-82, Al-A'raf ayat 118-122 iban Thaaha ayat 69) Ya Allah! Tunawa in katan kaput sihir sin manga Jin ini, sabab sin hinang nila mangi' ha maas ini. Allahuakbar!! (Ampa tihup ku pa baran sin manga Jin lamud na pa nakura' nila)
• -Apo' Jin: Arrrrghhhhhhhh!! Ahhhhhhhh....!! (Namid-pid ampa nanglukmay, nag asu in pamaranan nila katan. Tiyunaw sin Allah swt in sihir nila way nakapin).
• -Aku: Baita' kaw unu in dusa sin maas ini kaniyu danan jilaka' niyu? Baita' kaw?
• -Apo' Jin: Aahhhhh!! Way pus mu!! Tiyunaw mu in ilmu' ku sin way lamud mu!! Pangannal mu ikaw sadja in maingat!! Tanam kaw!! (Timindug siya ampa nag kimut-kimut in in simud biya' awn bassahan biat-bat niya. Nanamun ku nasangun mag balik in ilmu' sihir niya).
• -Aku: Ahaaa...siyangun mu in ilmu' mu. Dihilan takaw masa, tipuna in manga lahasiya' usba waris mu bang kau mabaya' mag bunu'. Sa' tanam kaw. Dihilan tapakaw hambuuk punglu' masakit amin di'na mara mu ubus ini.
• -Apo' Jin: (Way na biyah bissara, salta' tipun niya na in manga lahasiya' niya bang aku di' masa' 113 in taud nila amin makusug sadja katan. Ampa sila nag lu'tud namunu', dumugsu' sin kalis nila, lumagut kumakal. Ha kahandak sin Allah swt way naka sampai misan hambuuk bibinasahan nila pa baran ku malaingkan lawligid sila nabulakay sin piyapasaran ku sila).
• -Aku: Ubus na kamu!! Na, kawaa niyu isab in kaku'!! (Biyat-bat kuna kanila in surah Al-Hasyr dain ha ayat 21 pa 24. Ampa tihup ku kanila, Allah maha kawasa nasunug katan misan nag babaran basi'. Pama kuli'ik, haw hantal katan).
• -Apo' Jin: Arrggghhhhhhh!! Jukup....jukup, biyahna...surender aku....surender aku tuan ku!!!! Arrayyyyyyyyy!!
• -Aku: Maita' aku in nanunug kay mu? Kita' mura in baga kayu nahulug dain ha taas langit mawn kaniyu? In nag sunug kaniyu Allah swt Al-khalik in tag kapunnyahan sin luun dain ha taas langit sampai mari pa gumi. Allah in nag papanjari katu' niyu. Way maka dihil mudharat iban karayawan malaingkan Siya. Hisiyu in makusug ikaw atawa Allah!!
• -Apo' Jin: Huoan tuan Allah in makusug!! (Nag tutukku' liyalammahan)
• -Aku: Bayta' kaw sin bunnal unu in sabab jilaka' mu in maas ini? (Cool down na)
• -Apo' Jin: Nag tanum-tanum siya ha baba' sin bay namu'. Mag hibuk sadja siya iban magkarugtul niya in manga kaanakan namu'.
• -Aku: Ahaaa...bang kaw namaita' dain kaina di'nakaw masunug...kabus!
  
  Limingi' aku pa manga famili sin maas, yasubu ku sila bang in maas ini nag u'umah ha baba' kahuy dakula', laung sin manga anak huon kunu' bunnal nag tatanum-tanum siya ha baba' nunuk. Adlaw yadtu nag tagha' sadja kunu' himantak in maas ha bay pagdatung dain ha umah. Pag da kunu' pa hospital in bayta' strok kunu'. Laung ku korek sadtu, in strok yan katan labha' in panagnaan niya. In jin ini sabab sadja.
  
• -Aku: Kamu manga Jin piya panjari sin Allah swt dihilan kamu asal kalabbihan sihir (Masapat mag panaw, maglaggu' umasibi' ha kabayaan nila, maglupad iban maingat mag pasalupa unu-unu, di' kakitaan in baran nila ha mata zahir), yusal niyu ha bukun haq niyu. Bihaun hilla'a katan in sihir siyabulak niyu palaum sin baran sin maas ini, katan.
• -Apo' Jin: Huon.... sagawa' pabalika in kusug (sihir) ku (Masipa nag tutukku'. Asal in jin, bang sila masunug sin surah Al-Hasyr amupaka baran nila misan in ilmu' nila masunug da matunaw).
• -Aku: (Duwa'ahan kuna pa Allah swt, ampa jikiran ku Ya Hayyu, Ya Qayyum. Piyangayu' ku bang man hiuli' in ilmu' niya salama siya di' mangdupang. Sa' bang siya manipu ya Allah, bang man in ilmu' yadtu mahinang baga kayu jahannam halaum baran sumunug kaniya. Sabab in addat sin manga hayup ini pangdurupang).

sin hangka minit da limasig na in Apo' Jin ampa timindug, kawasa sin Allah swt. Nag guni-guni na aku, bang ini umatu pa kamatay niya na, wallah. Ay kita sab matuud, hilla' niya ra in sihir halaum baran sin maas. Pag hilla' sadja sin strok ha o niya naka tag magtu ha anak niya usug "Utu'.....!!". Unu pa nag tangis na in manga taymanghud iban kaanakan niya. Na hilu hala' na in laum bay. Pag hilla' isab sin sihir ha siki sin maas nakatindug magtuy. Mianaw magtuy pa unahan ku ampa aku siyalam sin maas iban pag tangis "Magsukul utu'...magsukul". Laung ku magsukul kita pa Allah swt, siya in nag pauli', Alhamdulillah!

Nahilla' mayan katan in sihir amin nahinang sakit sin maas, iyalup kuna in Apo' Jin, ampa ku diyaak siya mangannal. Yasubu ku bang unu in agama niya. Laung niya way agama (Ateis) niya, laungku dahun takaw palaum sin Agama Islam sumumbah ha nag papanjari katu' Allah swt. Laung niya unu in makawa' niya bang siya sumud Islam? Laung ku kasalamatan dunya akhirat (Ubus piyakita' ku kaniya in manga Jin piyasud namu' bakas Islam hiyatud namu pa Makkah al-Mukarramah, in sila nag sasahaya sin Iman iban Islam). Timangu' siya sumud Islam, ubus ku ijajahan, ampa piyabassa sila duwa kalimah Syahadat ampa hiyatud pa Makkah.

In janji' namu' aun 3 parkala':

1- Bang siya sumud Islam subay siya mangadji' madtu pa Makkah sampai siya mahinang alim ulama' sin jin ha kawman niya.

2- Ayaw na siya lumamud sin kahalan sin manusia' labi-labi na mangjilaka' iban daak-daakun sin manga pangungubat (magsisihir). Alam nila alam jin, alam natu' alam zahir. Sumagawa' bang siya tumabang pa manusia' ha kalna' Allah swt yadtu problema niya na (misan di'na siya mamaita' sin tatabangan niya pa manusia'), ayaw sadja bilang mangayu' tungbas kakaun (biya' manga mag labut) bat di' siya mahinang musyrik.

3- Bang siya dumagan dain ha Makkah mag balik pa maas jimilaka' mag balik, ayaw siya mag susun sabab bunu'un patayun atawa hukutan ku sila hambuuk kawman luunun jilun palaum kassa' itum sampai kiyamat insyaAllah. Ha masa kiyamat ha mahsyar ayaw sila tumuntut kaku' jinil ku sila sabab dusa nila ha kakahinang nila.

Ubus biassahan (tiyawalan) ku in maas tubig iban suwa' iklug (21 in taud hipamaigu' niya) minuy' kami. Sampai pa bihaun wai na diyungug ku kiya balika sin sakit. La hawla wala quwwata illa billahil aliyul 'azim.

Ibnu Elaji

Sakit 1: Pag babuy-babuyun (Epilepsy)

Ngan: Asrab bin Hajan (Usug)
Lokasi: Sandakan, Sabah.
Sakit: Babuy-babuy (Sawan)
Ummul: 23
Sakit timagna': 1994
Kiyauli'an : 2008
Simtom: Humantak manugas in pamaranan, in mata limiggat pa taas ampa magbukal in simud. In ngan ha saintifik nia Epilepsy.

Palihalan:

In tagnaan tuud wai sa sakit sin bata' ini ha sawaipa tahun 1994. Bata' malasig mahanunut iban nag iskul matuud ha Sandakan ha masa yadtu. Amusadja adlaw yadu minui' siya pa bai hapus-hapusan nag panayam marai' iban manga kabataan hangka lungan. Ubus himali magtue siya bia' namid-pid sa' wai sab himantak atawa na punung. Magsusung in adlaw mag duruhun in pid-pid. Biya' pagkublaan siya hikabutan in manga basu dain ha lima niya baubagbag. Bang siya asubuhun maita' siya na bihaini di' na maingat jumawab.

Liabayan pila bulan in sifat niya napinda na. Hinnuk na kaagi di' na maghidjul. Nagkasusahanna in maumaas diya na pauyu-pauyu ha pangungubat sa' masi-masi ra man in sakit. Laung sin pangingita' jilaka' kunu' sin apo' (Jin) ha taas kahuy dakula', na unu pa nag labut nasab. Amura misan nag labut na bahasa in pagubat sa' waira kiyaulian. Mainaat-mainaat bihadtu na sadja mag pid-pid. Limabay mayan hangka tahun, in pid-pid niya napinda na nahinang na grabe, humantak ampa magbukal in simud. Babuy-babuy na. Sigi-sigi in pag da pa manga pangungubat. Ginisan na in sukat sin mangungubat, in pag labut misan di' nakau baitaan. Sa' amu-amura, ampa na grabe in sakit.

Hangka adlaw in bata' humantak maka 4 atawa maka 5 babuy-babuyun. Tumaka, waina pia iskul. Sabab nagkomplain in mastal nia di' na kunu' sila maka gaga mag tabang kania adlaw-adlaw halaum klas. Piahundung na nag iskul. Sabab nahinang na bobo. Nalawa' na in pikilan. Ha tahun 2001 grabe na tuud. Magdagan na sia pagua' sin bay ampa lumapug dumagan. Madaran na mag "jack-night" dain ha taas kantil pa baba' biah Superman. Jaujagjag in simud iban nabali' na manga in ipun nia ha unahan, maita' di' bang lumaksu ampa tumumbuk bia' hilam pa baba'. Hambuuk adlaw nalawa' siya ha bay. Hangka pitu nalawa' wai kiabaakan. Nag tautangisanna in maumaas. Ai kita sab in manga maas matuud, misan sab manga dupang na in anak, sa' in kasi lasa nila di' tuud pag kasambian.

Siumu na naglawag, tumaka nakadtu pa hospital sin Sandakan. Kiabaakan na halaum sin wad piapaglamud na hamanga tau kili' katan. Hiuhukutan in lima ha taas kantil sin hospital. Nag tautangis na in maas pag kita sin anak matuud piapag lamud ha manga tau dupang-dupang. Maraw sab in hospital (sukud tuud) aun bahgu Doktor datung dain ha Pakistan specialist siya ha Epilepsy. Tiyahan na matuud, ampa piyangadjian in sakit nia halaum hangka bulan pa duwa bulan. Alhamdulillah kimulang in sakit nia magkapunung amin humantak yadtu. Misan sab humantak halaum sin hangka pitu makaminsan da atawa makaduwa, bukun biya' sin tagna' hangka adlaw maka 4 humantak.

Ha tahun 2007, in sakit niya masi-masi naman. waira nalawa'. Misan siya nag iinum ubat dain ha hospital humantak da. Amusadja in hantakan nia maintain kaagi halaum sin hangka pitu maka minsan. In kabayaan sin manga maas waina ba in sakit, mauli' na. In lugay na hadtu wai naman kiyaulian sin Doktor Specialist? Nag lawag nasab pangungubat, misan iyanun naubus na in pangungubat ha Sandakan siulayan nila nag ubat sa' amura humantak da.

Ha awal sin tahun 2008, siulayan namu' iyubatan sin kaedah namu' ini. Di na kiabaakan namu' in sabab sin sakit ini. Ha kahandak sin Allahu taala, naurul na mu' in puunan asal usul sin sakit. Marai' mataud in di' magkahagad sabab in sakit ini mistik (Ghaib). Hi sue-sue ta in kronoloji niya:

• 1994 - Sa'bu nag panayam in bata' ini iban manga kabagayan niya ha higad bud (Ampa mataud nunuk ha taas bud yadtu). Narugtul sin bata' in lalabutan sin tau biyubutang ha baba' nunuk. Putan indaginis kolol piapanji-panjihan natasak sin bata'.


• Diyugalan in nakura' sin apo' (Jin) tag jaga sin nunuk sabab gindasan in kakaun niya (lalabutan). Hi kasue-sue ta in nakura' si apo' Jin ini malaggu' mataas in pag baran itum dakuman sin bulbul. In tanduk biya' tanduk kabaw nag sasangal pa taas (Dih da tuud kakitaan agun in lupa dagbus nila, haw-haw madtu). In taud sin bataan nia agun di' maitung sin lima. Makira in taud sin dahun nunuk amu na yadtu in taud sin bataan niya.


• In teknik nila mamuhinga', diyasukan in o iban tiyan sin bata' (sakitan) yadtu sin itum (sihir) wai halihan adlaw-adlaw. In sihir piasud palaum o sin bata' amin maitum iban mabisa madtu. In niyat nila mamahuli sabab tiyasak in kakaun nila, bang aun dapat in bata' ini masakit iban in famili nia magkasusahan, biya' da sin susa nila tiyasak in kakaun nila (lalabutan). Diyaak in hambuuk bata' jin mag jaga ha taikud sin bata' (sakitan) ha supaya wai pangungubat makaubat. Kitaa niu yan, bang in mag ubat mag jijin da, waina "harapan" sambat sin malayu.


• In pag ubat ta, ha tagnaan wai ta pa kiaabutan tuud in puunan. Hat kiabatukan in jaga nia ha taikud. Bang asubuhun in jaga ha ulihan di' misan mag hidjul, ampa madtu binsana' namu' na biya' bukun parashan jin. Pangindanan ta, in jin bang di' mag answer yan aun pa nakura' nia hangkan siya mabugah missara. Liawag namu' nasab in nakura' nia, kiabaakan namu' diya namu' sadja nag soal-jawab. In agama nila Hindu. Naraug nag 'debate' iban in maka inu-inu di' umatu mag bunu'. Marai' kita' niya in bata' nia nabiya' nangka' halu' nahulug pa lupa' hiyantakan sin jurus.


• Naraug man in nakura' Jin nag debate diaak namuh piya kawa' in haq (sihir) nia amin biutang nia palaum baran sin bata' (sakitan). 30 minit isab nag limas sin kagaw halaum baran sin bata' sakitan yadtu. Ubus ijajahan namu' sin agama Islam, aun hambuuk ustaz timabang kamu' nag ijajah. Ubus yadtu piyapi' namu' sumud siya Islam atawa luunun palaum kassa' jilun. Simud Islam in nakura' Jin lamud na pa manga bata' nia biya' banus unu, Alhamdulillah. Ampa hiyatud namu' pa Makkah Al Mukarramah.


• In bunnal nia in pag ubat namu' ini ha kalayu'an. In kami yari ha Kuala Lumpur nag ubat. In iyubatan yaun ha Sandakan. La hawla wala quwwata illa billah.... Kawasa sin Allah swt. In malayu' mapasuuk. In jin bang mag hibal ha lilingkuran malallai, sa' bang manaw pakain lokasi masapat, masapat pa dain ha sahaya. Amuyan in kalabbihan dihil kanila sin Tagipun.

Pag kunsum tiyalipunan ku sila sabab insyaAllah kauli'an na. Bihaun, bulan September Miladiyah, Ramadhan Hijriyah na, way na himantak in bata' sakitan yadtu. Amusadja masi pa isab nag iinum ubat ha hospital. Piyapag lamud-lamud na in pag ubat bang man da wai na paglabut-labut. Hisiyu-siyu in bulat in mata atay nila kaingatan iban kakitaan nila tuud bang unu un umarung ha lalabutan. 100% in umarung ha lalabutan amuna in Jin way agama atawa kafir, bang Jin Islam in kumaun mabilang na Musyrik atawa Zindik sila. In Jin yan misan di' mu pakaunun maingat da sila lumawag kakaun. Sila na in kumaun mag lami-lami misan in sakit di' da sila maka pa uli'. Hambuuk-buuk in TAGIPUN in makapa uli'. Sung kita niyu manga taymanghud, lawakun taniyu in manga kasyirik-syirikan dain ha baran, famili atawa pa kawman taniyu. Wallahu a'lam.

Sue-sue dain kan:

Ibnu Elaji

Ramadhan 2008

Ijazah Ilmu' Pagubat:

Sanad namu' ha Ilmu magubat:
In ilmu' pagubat kiawa' namu' dain ha tuan guru namu' Al-Fadhil Ustaz Nazri bin Hussein (Bang man siya halaum karedhaan sin Allah swt iban tungbas maraw kania dunia akhirat), in ilmu' nasaud namu' kania aun 5 ginis:

1. Ilmu' magubat ha Zahir 1: Bekkam (Al-Hijaamah) mag paguah duguh malummi' halaum baran. Aun 2 mazhab nakawa', mazhab Sunnah & mazhab Korea.


2. Ilmu' magubat ha Zahir 2: Magubat katan ginis Canser (misan grabe kaubatan da - Ayau sadja na operate na ha hospital). Sunugun ampa pipisun in pais sin umang atawa kaykay atawa unu naka amin taga pais matugas. Amuyan in pag ubat.


3. Ilmu' magubat ha Zahir 3: Magubat Lasdung & Maglupput in jubul.


4. Ilmu' magubat ha Batin 1 (Ghaib): Sasuku' sin pagsuran Jin in baran, atawa unu-unu nasadja sakit maka inu-inu ha sabab sadja sin Jin (Syaitan, Ifrit) danan in tau di' makatug dum, magkatul, magbissara baibidda' biah dupang-dupang, magsakit in daghal, siki, sakit-o, pangdurgal, pagda'ganan bang na tutug, mag pakitah jin atawa lutaw, pag kaabatan madaran...atawa ginisan naman insyaAllah kaubatan.


5. Ilmu' magubat ha Batin 2 (Ghaib): Hinang-hinangan sin tau - tiambul in suratan, tiambul in lidjiki', in shop dih pag bayaan sin kostomer, mag kalu sadja dua mag tiyaun mag binasa, ini aun sadja problema.
   

Sanad ilmu' kabatinan iban ruqyah kiawa' namu' da isab dain kan Ustaz Nazri bin Hussein ha sara' Talaqqi ha 5 parkala' :

• 1- Hafalan Al-Qur'an al-Karim dain surah-surah "permohonan" ruqyah.


• 2- Hafalan Hadis-hadis Rasulullah saw iban sara' manara' pagubat warisan nabawi.


• 3- Ammalan Tauhid Lam Jalalah (Lam Zat) sampai tapus tingkat hika-4 iban sara' manara' ha pagusal (Bang biaddiin in pag hukut jin iban mag luun palaum kassa', mag bunuh iban makhluk ghaib bang dih na mara isun). Ammalan ayat 4.


• 4- Ammalan Ilmu' Nafas nurulhaq (Jurus Budi Sutsi), 50 langka tapus. Iban praktis silat Jurus "Gerak".


• 5- Praktis kaedah "Scan" atawa tilikan (mukassyafah). Scan nabahagi' mag-3: a)Umusal mata b)Umusal atai c)Umusal nanam sin lima. Kaedah Scan importante tuud ha magubat bat kaingatan in puunan sin sakit. Bang kaingatanna in puunan ampa maluhai ubatan. Satiap manusia' bani Adam ini aun scan nila, subay lawagun, praktisun subay bangna kabaakan. Kunsi' nia "munajat pa Allah swt, makasi malasa baing ulungun".

In ilmu' ini malarak bang kalamuran sin ilmu' itum (sihir). In guru namu' very sensitif lumawak ha manga ayat-ayat amin di kaingatan in puunan bang kiawah namuh dain ha gua' (puas Quran iban Sunnah iban atsar sahabat) labi-labi na amin di' kapahaman. Bang kita taga panghati kaingatan ta ra in bassahan yan (kamilla-kamilla) bang nur nia gumua' itum yan sihir. Sah bang sya putih atawa biyaning in nur nia insyaAllah ok. Al-hasil in katan manusia' nag aammal ilmu' tapil (jin) misan siya jin Muslim tattap itum da in nur nia. Bia' sapantun nagdara lahut/laring mahait ha lima nia, hambuuk adlaw palian da siya. Amuyan in addat sin Jin tapil, hambuuk adlaw mamuhinga' da pa tau nag usal kaniya. wallahu a'lam.

Staff Klinik Nurusyifa' 2008.